ކުޑަކުދިން ސިޔާސީ ކަންކަމުގައި
ހަރަކާތްތެރިވުމަކީ އާކަމެއް ނޫނެވެ. އަދި އެވާހަކައަކީ އާވާހަކައެއްވެސް ނޫނެވެ.
ދޭތެރެ ދޭތެރެއިން ސަރުކާރުގެ އިސްވެރިން އެކަން ހަނދާން ކޮށްދެއްވައެވެ.
ސިޔާސީ ކަންކަމުގައި ކުޑަކުދިން ބައިވެރި ނުކުރުމަށް އިލްތިމާސްވެސް ކުރައްވައެވެ.
ނަމަވެސް މިކަމަށް ހުއްޓުމެއް ނައެވެ. މިވަނީ ކިހިނެއް ހެއްޔެވެ؟ މިކަމަކީ
ކޮންބަޔަކު ކުރުވާ ކަމެއް ހެއްޔެވެ؟
2006 ވަނަ އަހަރުގެ ޖުމްހޫރީ
ދުވަހުގެ މުނާސަބަތުގައި ވާހަކަފުޅު ދައްކަވަމުން ރައީސް މައުމޫން ވިދާޅުވީ ސިޔާސީ
އޮއިވަރުގައި ކުޑަކުދިންގެ ސިކުނޑިތައް ޖެއްސުމަށް ބަޔަކު މަސައްކަތް
ކުރާ ވާހަކައެވެ. ވަރަށް ރަނގަޅު ވާހަކަ ފުޅެކެވެ. އެއީ ޒަމާނުއްސުރެވެސް މިގައުމުގައި
ކަންހިނގަމުން އައިސްފައިވާ ގޮތެވެ. އަޅުގަނޑަށް ނޭނގިގެން މިއުޅެނީ ރައީސް
މައުމޫން އެވިދާޅުވާ ބަޔެކެވެ. އެބަޔަކީ ކޮން ބައެއް ކަމެވެ. ރައީސް
މައުމޫންގެ ވާހަކަފުޅުގައިވެސް އެބަޔަކީ ކޮންބައެއް ކަމެއް ވިދާޅެއް ނުވެއެވެ.
ނަމަވެސް އެބައިމީހުންނަށް ޚާއްސަ ވެފައިވާ ދެސިފައެއް އެމަނިކުފާނު ފާހަގަކުރެއްވިއެވެ.
އެމަނިކުފާނު ވިދާޅުވި ގޮތުގައި އެބަޔަކީ ދުރުވިސްނުމެއް ނެތް ބަޔެކެވެ. ނުވަތަ އަމިއްލަ
އެދުމުން ފުރިގެންވާ ބަޔެކެވެ.